Nove puntos será a renda que defenda o cadro sarriao no encontro de volta da próxima fin de semana, no que as capitalinas buscarán recuperar o primeiro posto
Tan só dous encontros dos catro programados para esta terceira xornada da Segunda División infantil feminina se disputaron, xa que dous deles foron aprazados para próximas datas.
O encontro máis destacado medía a Sarria e Ensino en Novo Chanto, co primeiro posto da competición en xogo. Un chanzo ao que, polo menos durante esta semana, subíronse as sarriás tras impoñerse 49-40. Nove puntos de renda que defenderán no partido de volta que se disputará a próxima fin de semana, do 27 ao 28 de novembro, en Lugo.
Franciscanos estreou a conta de vitorias esta temporada ao impoñerse no Anexo, 51-32, a Baxi Ferrol, deixando moi boas sensacións que esperan confirmar no encontro de volta en Ferrol.
Os outros dous encontros programados foron aprazados, polo que Cidade de Lugo, que suma dúas vitorias en dous encontros, recibirá a BBCA o 8 de xaneiro, e Burela a Tirso de Molina o 27 de decembro en Vista Alegre.
