Burela e Viveiro, os únicos coa folla de ruta impoluta esta tempada

Os dous conxuntos mariñaos mantéñense invictos na Segunda División infantil masculina: Os de Manolo Cobas, tras impoñerse por KO a Maristas.

Non houbo sorpresas na terceira xornada da Segunda División infantil masculina na que os tres equipos que xogaron co factor pista a favor cumpriron cos pronósticos.
Frigomar Burela segue no máis alto tras impoñerse a Maristas con comodidade, 70-21, nunha nova exhibición de potencial dos de Manolo Cobas. Tamén gañou con marxe Cidade de Lugo no derbi capitalino da xornada tras impoñerse a Galén Ensino no Anexo, 80-33. Mentres que o encontro máis igualado desta terceira xornada da Segunda División infantil masculina viviuse en Viveiro, co triunfo local 58-41, ante Estudiantes Río.
Con esta nova vitoria, Viveiro mantén o pleno de triunfos nos encontros disputados, tan só dous, ao ter en conta que os mariñaos teñen un partido pendente ante Maristas, correspondente á primeira xornada.
De cara á próxima fin de semana repítense os mesmos enfrontamentos coa diferenza do factor pista. Nesta ocasión, Frigomar Burela terá que confirmar o seu liderado ante Maristas en Lugo, Viveiro o seu pleno de vitorias ante Estudiantes no Anexo e Galén Ensino recibirá a Cidade de Lugo.
Todo isto na cuarta xornada, a última antes de afrontar o parón pola ponte da Constitución, que aproveitarán Viveiro e Maristas para poñerse ao día, ao xogar o encontro aprazado da primeira xornada.